30.12.2023

Ассалому алайкум, қадрли тумандошлар!

Аввало барчангизни тобора яқинлашиб келаётган янги – 2024 йил билан чин қалбимдан табриклайман. Барчангизга янги йилда янги ғалабалар, улкан муваффақиятлар, янги марраларни забт этишни тилайман.

Азиз тумандошлар!

Йил якунланар экан, ҳар биримиз унинг ҳаётимизда қандай из қолдирганини бир-бир ёдга оламиз ва албатта келгуси йил учун ўзимизнинг режаларимизни тузамиз, янги йилдан аввалги йилларда амалга ошмаган орзу-истакларимизнинг ушалишини умид қиламиз.

Ҳеч шубҳа йўқки, 2023 йил мамлакатимиз тарихида бўлгани каби туманимиз тарихида ҳам бир қатор янгиликлар, инсон қадри учун амалга оширилган кенг кўламдаги ислоҳотлар билан ёрқин из қолдирди.

Жорий йилда туманимизда аҳолини рози қилиш, уларга зарурий шарт-шароитларни яратиш мақсадида турли дастурлар доирасида бир қатор ишлар амалга оширилди.

Жумладан, ҳудудларда

- йўлларнинг 117,7 км.и асфальтланди, 36 км.и шағаллаштирилди;

- 11,2 км пиёдалар йўлаги қурилди;

- электр таъминотини яхшилаш мақсадида 22 та янги транформаторлар ўрнатилди, 1850 та таянч устунлари, 139 км электр тармоқлари янгиланди;

- ичимлик суви тармоғи етиб бормаган ҳудуд аҳолисини ичимлик суви билан таъминлаш мақсадида 197 км. янги тармоқ тортилиб, йил давомида 21 мингга яқин аҳолига илк бор ичимлик суви тармоғи етиб борди.

- 6 та янги маҳалла биноси қурилиб, фойдаланишга топширилди

Шунингдек, “Обод хонадон”, “Обод кўча”, “Обод маҳалла” мезонлари асосида улкан бунёдкорлик ва ободонлаштириш ишлари амалга оширилиши натижасида Хонработ маҳалласи аҳолисининг бир неча йиллик орзу-истаклари рўёбга айланди. Қисқа муддатда жами 13,5 млрд сўмлик ишлар бажарилган ушбу маҳалла тумандаги энг обод манзиллардан бирига айланди.

Ҳурматли тумандошлар!

Янги йилга ҳам олдимиздаги вазифаларни ҳар қачонгидан-да юксак белгилаганмиз ва уларни амалга оширишда барча имкониятларимиз мавжуд.

Энг аввало маҳаллаларда аҳоли яшаш шароитларини, инфраструктурани янада яхшилаш ишлари изчил давом эттирилади.

Шу билан бирга, аҳолимизни иш ва уй-жой билан таъминлаш, таълим тизимида туб ислоҳотлар амалга оширган ҳолда, барча мактаб ва мактабгача таълим ташкилотларининг моддий-техник базасини мустаҳкамлаш, аҳоли саломатлигини тиклаш ва касалликларнинг олдини олиш йўлида туман тиббиёт бирлашмасини энг замонавий тиббий асбоб-ускуналар билан таъминлаш, саноат, қишлоқ хўжалиги, хизматлар соҳасидаги кескин ўсишларга эришиш, туманнинг туризм имкониятларидан самарали фойдаланиш каби ўта муҳим ва долзарб вазифалар ҳам келгуси йил учун асосий йўналишларимиздан бўлади.

Бир нарсани ишонч билан айта оламанки, бу каби улкан вазифаларни бажаришда ватанпарвар Қизилтепа аҳолиси ҳам ўзининг фидойилиги, юртга муҳаббати, мамлакат тараққиётига даҳлдорлик ҳисси билан ўз ҳиссасини қўшади.

Мен барчангизга ишонаман!

Азиз тумандошлар!

Барчангизни яна бир бор кириб келаётган Янги йил билан чин қалбимдан табриклайман.

Янги йилда янги қувонч, янги ғалабалар, барча орзу-умидларингиз ушалишининг тилакдошиман.

Шу билан бирга, Сизларга мустаҳкам соғлиқ, хонадонингизга оилавий бахту саодат, файз-барака ва тинчлик-осойишталик тилайман.

2024 йил қутлуғ ва баракали келиб, ҳаётимиздаги энг яхши йиллардан бири бўлсин!

Янги йилингиз муборак бўлсин!