26.09.2023

Qiziltepa tumanida “Yangi uyg‘onish davri kitob va kutubxonadan boshlanadi” shiori ostida “Ma’naviyat va ma’rifat haftaligi” o‘tkazilmoqda.

Tumandagi 27-sonli umumta’lim maktabida haftalik doirasida kitob marafoni va  ma’naviy-ma’rifiy tadbirlar tashkil etdi.

Dastlab, tuman Ma’naviyat va ma’rifat bo‘linmasi rahbari N.Kenjayev Ma’naviyat va ma’rifat haftaligining mazmun-mohiyati, o‘tkazish tartibi xususida ma’lumot berdi va yig‘ilganlarni tabrikladi. So‘ngra maktab kutubxonasida tuman Axborot-kutubxona markazi tomonidan yosh kitobxonlar va tadbir mehmonlari ishtirokida kitobxonlik targ‘ibotiga bag‘ishlangan yangi loyihalar va yangi adabiyotlar taqdimoti o‘tkazildi. Taqdimot jarayonida yosh kitobxonlar ishtirokida “Kitobloto” o‘yini ham tashkil etilib, unda kitobxon yoshlar badiiy asarlar yuzasidan bellashishdi.

Tadbir doirasida tumanda samarali ijod  qilib kelayotgan ijodkorlar I. Hasanov, P. Mansurov va Sh. To‘xtayevalar bilan ijodiy uchrashuv ham tashkil etilib, ijodkorlar she’riyatga, kitob mutoolasiga qiziquvchi yoshlar  bilan o‘z mulohazalarini o‘rtoqlashdi.

“Kitob sovg‘a qil, ma’naviyat ulash” kitob aksiyasi doirasida kitob yarmarkasi tashkil qilinib, kitob marafonida ota-onalar hamda maktabning sobiq bitiruvchilari maktab kutubxonasiga 300 ga yaqin badiiy kitoblar sovg‘a qilishdi.
Shuningdek, aksiya doirasida maktab kutubxonasiga tuman  Ma’naviyat va ma’rifat bo‘linmasi tomonidan ham kitoblar jamlanmasi taqdim etildi.